(Tami laihah pen MYCA Voice a diinga kahah ahia, USA ka tunzou a kagel masahpen ahia, August 23, 2003 a kagel ahi hi)
Hello!
Seppi Ngaihuoitahte leh Lawm leh gualte zousie;
Pasian min leh USA apat in chibai hing bawl masa pen ing!
Pasian hepina leh noute hing thumpinate ziehin damin ka zinnate zouta ing. Kolkata apat in August 22, 2003 zingmawng nai 7:50 A.M. in British Airways in ka lengkhie uhi. Vanleng sung pen Domestic Airlines (Indian Airlines bangdeu te pawl) sangin a standard mama mai hi. Touna teng ah T.V. a kithuo a, kou tuonna pen ah Chennel 13 tan a um hi. Tam Chennel 13 te lah ah khat khu MAP ahia, tuapen in i Vanleng tuanna pen geina tantan alim in ang ensah hi. Asandan (Altitude), Alen hatdan (Ground speed), Zotmun gamlatdan (Distance to Destination), A Vanleng umna chet a kholum khovot (Temperature Outside), Kipatkhietna a dah ginzat (Local Time at Origin), Tunna diing a dah ginzat (Time at Destination), Tunna muna tua laitah a dah gingzat (Local time at Destination) leh Hui hatdan (Head Wind) chite zousie a ki enthei zing hi. I vanleng lim zong gam atot dan danin agam amuol tunga alen dandan in a kilang hi. Etsahna diingin: Moscow khopi tungzawn a kalen laitah ua tomkim a ka chiemte silte envai:
1. Altitude: 35, 000 feet
2. Ground Speed: 822 km/h
3. Distance to Destination: 2531 km
4. Outside Temperature: -54*c
5. Local time at origin: 14:50
6. Head Wind: 55.43 km/hr
Tambang dandeu in i umna teng a theithei mai hi. Alim tawh kithuo ahijiehin geinateng alim a zong etthei zing ahi hi. Nuom mama mai hi. Neeh lampang ahileh vanleng tungah atam mama mai hi. Dei dan dan teel a du zaza neeh mai diing ahi. Breakfast zou in khat vei ni vei vel kane man a, eilam dah 4:00 P.M. velin lunch (ann zing ann/sun ann) ang hawm ua, themkhat ka neeh zou in breakfast apat a tawplou phiel a neehthei dawnthei nezing dawnzing a ka umdante, lunch a tuithei dante tawh inn langate neeh muzoulou zen a khosa pankai zena nasem ka innkuonpite, pawlpite, chi leh namte leh mizawng mi liengvaite ngaituona in ka ngaituona zousie lamangin, tuitah a ka neh diing ka ann neh hun diing zousie khu luonhi leh nainap siana’n kazang kha a, nehthei kichi mawng mawng ka nethei nawnsih hi. Ka kam a ka hen sawm chin in hitui naptui in ang tum zing hi. Tam hun khu Baltic Tuipi tunga ka len laitah uh ahi. Afghanistan (masang laia USA te’n Osama Bin Laden abeina mun uh) tung velah ka leng ua, laibu a kigiel ma bangin agam agaw mama a, sehneeh gam dandeu ahi mai hi. Vanleng tung apat a kihoimu mama hi. Tuate ka mu chiengin igam hoidan leh nopdante ka theikhie a, Pasian min thupi kaphat hi. Kolkata apat a hun sawtsim pikhat kalen zou un London International Airport eilam nitahlang dah 6:12min. 05 sec. in London Airport bawta ung. Amau lang a diingin nitahlang dah 4 vel ahia, ni asang mama nalai hi. London International Airport thupidan khu minute 5 chinin vanleng atung leh alengdoh a kiphamat zing hi. Vanleng en utte a diingin mittai ahuoi mama diing hi. Dahkaal ni vel London Airport a khawlzou nua in USA zuon diing British Airways BA 299 kichi khat ah ka tuong kia uhi. Tuapen eilam dah 8:50 P.M. velin London vanleng phuol nuasie ta ung.
Atlantic Tuipi tungah sawtpi ka leng uhi. Greenland nuoideu ah eilam jankim dah 12:34 A.M. (Dt. 23 th August 2003) velin ka leng uhi. Eilam a jankim ahivangin tua gamte ah ni atum naisih hi. Nisa nuoi a leng zing kahi uhi. Laisimte'n atheisiem diing uhi. Ni (Sun) umdan leh leitung kipeidan apat a suikhiet diing ahi. Vanleng tungah thumna kanei mun mama hi. Ajiehpen vanleng apat a leitung i etleh a lamdang a, Pasian thupina a kilang taluo hi. Lapite 19: 1-2 en him him vawi! Tuate'n ka lung akhoi mama hi. Eilam dah 4:10 - 4:20 A.M. sungin Pasian kunga lungdamthu genna leh panpi ngetna kanei hi. Eilam zingmawng dah 4:45 Min. 07 Sec., amau nitahlang dah 6:15 P.M. in ka tunna diing khopi International Airport ah lenglutta ing. Tam hun in ni atum naisih. Kolkata a ka vante tawh kikhen pen tua Airport ah kala pan hi. Customs leh Immigrations te'n abawl diing teng uh abawl zou un ka pawtkhie a, ahing pick-up diingpa tawh eilam dah 5:45 A.M., amau lang 7:15 P.M. velin ka kimu uhi. Tuahun pen nitumzou khomui kipat hun ahi hi. Tuana patin taipai in dahkal thum diing vel katai zou un ka umna diing Apartment ka tungta uhi. Eilam dah 10:00 A.M. ahia, amau lang dah 11:30 P.M. velin ka tungta hi. Apartment No. 451 ana hi hi. Amau langa diingin jan dah 11:00 P.M. henta ahijiehin ka lawmpan ang peisanta hi. Eilam innte sangin keima tanga ka umna diing inn khu a thupi zaw tham tham hi. Lupna dunlop lah feet thum vel a sang zawzen. Tuong teng lah carpet (puon tahtah) eilanga dandeu loute kipha, touna zong sofa himai dan ahi. Chaksang ah, freeze, Micro-oven, leh adang dang electrical appliances a um hi. Anneh tuidawn bawlna lampang zangkhai mama hi. A inn umdan gen diing chilei tamsang in atamzaw nalai hi. Atom lama genin inntha lihleh sunga kilut ahimai hi.
Tuanah giehpai in zingkal in kavah kawi kawi theita hi. I kimupi, i kihoupi leh i kipawlpi zousie Zou kahi kichi diing mawng mawng a um tasih hi. Achang chiengin lunglen ahuoi mama hi. Siltha kamu khat kia ahileh “Farm Land” ahi hi. Ka Seminary/College uh khopi sung ahilou jiehin loubawlna mun ahia, aloute uh kamu in lamdang sahna lienpi ang pie hi. Machine ngentang a kisem ahi hi. Ka mu masang a America te’n lou nasemte a zatat dan uh kigente adih dan kathei valuoi hi. A loute uh alien thei khopmai hi. Among khat apat in amongkhat a mite muzou ahisih hi. Mi khat lou (Firm Land) pen Lamka leh Daijang kikal a Zanglou te chie apha mai diing hi. Farm Land kei mute ah vaimim leh bekan a ching uhi. Eilam dah 10:55 P.M. amau lang sun 12:35 P.M. in Bazar kakai uhi. A bazar uzong inn lienpikhat ahia, tuanah silteng akim mai hi. Eilang banga Bazar nupi tamtah touna a umsih. I deidei lahdoh a, atawpna a aman pieh diing himai ahi. “Khara hap aw ne” chite umlou ahi. Tuazou in eilang dah 1:00 A.M., amau lang dah 2:30 P.M. velin MGP Office kang phone hi. Ke'n nitah langa kang bawl hinapi noute zanlai imutnuom nou kang suhbuoi khah ziehin kisuonla huoi sa mama ing. Hing theisiem mai un aw. Lawmte leh sangsye te deisahna tangin ka inn ah ann ka huon kha naisih hi. Tam email kang bawl in zong Airport a hing vaidawnpa inn a ann kanehna apat a kang bawl ahi. Aban ahun hun in hing theisah zel vang.
Hattuomte’n hingna thumpi zing un. Mimal mal thumna zong ka poimaw mama mai hi. Kang ngai thei mama hi. Damvai Mangpha. Noute'n zong thu hing theisah zel un aw?
A hing galot zing leh Manggam a na seppi uh,
Khai Minthang
Lincoln, Illinois
No comments:
Post a Comment