PASIAN PHATNA LEH BIEHNA
Sermon 10/7/2018
Pastor Khai Minthang
"Kipah thugen kawm in a katpi ah lut unlen, phat kawm in a biehinnpi huong sung ah lut un, akung ah kipahthu gen unlen Amin phat un." (Psalms 100:4)
THUPATNA: Praise and Worship ichi chieng in bieh kikhop hun chieng a hun hon masang a Pasian phatna lasahna leh ki-apna pen hi diing a ngaisut tampi um a, mimal hinkhuo a "Praise and Worship" omtheilou diing a ngaisut pawl om hi. Pasian phatna leh biehna khu a mipite a diing a bawl diing a kilawm leh Pasian in ang lamet khat ahi hi. I Lai Siengthou simna apat in Pasian biehinnpi a kipattah leh thanuomtah a lut diing in ang hil hi. Mawhpuoh zawna maimai hilou in thanuomtah leh kipahtah a lut diing in hing hil hi. Eiten Pasian ibieh chieng ua mawpuoh zawna mai a ibawl khah diing uh zauhuoi hi. Ama bie leh patawi diing a kipan ihi ua, mihing kiletsahna gen diing a pei ihi sih ua, Ama thu gen diing a pei ihi ua, mihing thu gen diing ihi sih uhi.
PHATNA: Lai Siengthou sung ah Pasian tawh kinaiten Pasian phatphat ua, biebie uhi. Van misiengthou seraphim-ten Pasian khu "Siengthou, siengthou, siengthou Mangpa Loupipen" (Isa. 6:3) chi in phatna leh biehna nei den uhi. Nasepte 16:25-34 sung ah Paul leh Silas Philippi suongkul sung a Pasian phatna la asa uh chi imu uhi. "Hinanleh zankim lai in Pau leh Sailas in thu angen ua, Pasian kung ah phatna la asa ua, suongkul tangten angai uhi" chi imu uhi. (Nasepte 16:25) Pasian aphatna uh ahi diing ma in i ngaisut maithei uhi, hilezong Pasian apatphat uleh "thakhat in zil nasatah in ahing kiling a, tuachi in suongkul suongphumte na-ngawn a kiling gawp a, tualeh suongkul kotkhate zousie ahing kihong pai a, michin kolbu zousie ahing kitol siengta hi" chi imu uhi. (verse 27) I Mangpa Jesun zong mipi 5,000 avah lai in Annpheng pheng nga leh nganou nite la in lungdamthu agen a" (John 6:11) chin kimu thei hi.
Pasian aphatphatte a diing in Pasian in sillamdang bawl nuom hi. Ngetthaw sang in phatthaw lei sil lamdang tangtung baizaw hi. I poimawnate theipan Ama lungkimsah pou lei ang penuom thamtham hi. Praise and worship hun chieng maimai a Pasian phat diing hilou in niteng-hunteng a Pasian phat diingte ihi uhi.
BIEHNA: Abraham tangthu i-et leh ama kum 100 a upa leh Sarah kum 90 ahinua in Pasian in Isaac piehchiem hi. "Abraham a khupboh a, anui a, a lungsim in, mi kum za a upa in ta anei diing adiei? Tualeh Sarah, kum sawmkuo a upa in ta ahing diing adiei?" achi a, Sarah zong, "ka teeh nua in kipahna ka nei na didi izaw? Ka mangpa zong lah ateeh tangal a chi in a lungsim in adap nui hi" chi kimuthei hi. (Gen. 17:17; 18:12) Tahsa dana a mihinnate uh a et chieng un hitheilou diing chi thei in, a guolzawlna uh gingta zoulou in dap nui kiuh-keuh lel uhi. Tami kamchiem a kiphieh zounua kum khat pawl in Isaac hing pieng hi. Teehsete geel kipah diingdan ngaisut mai in zong theithei ahi hi. Atapa uh Isaac a hawmthaw didan uleh adei didan uh lungsim ngaisutna ah theithei ahi hi. Tualaitah in Pasian in, "Tu in na tapa, na tapa tang neisun Isaac na itt mama zawpi inlen, Moriah gam ah pei inlen, khuna ka hing hil diing taangte lah a khat ah halmang sillat in lan in" achita hi. (Gen 22:2) Abraham in bang lungsim anei diei chipen genlou in zong theisa ahia, azi Sarah numei teehsie khat a diing in shi ngaphoui zaw maithei diing hi. Hilezong, Pasian in anget dungzui in Abraham in pe-ngam hi.
Khatvei teng in Pasian thupha ingate Pasian in ang ngetkia chieng in kipe-ngam nawnlou hi. Eima dan a ngaisut in Pasian thupha thupi deute eima a diing a ninghep in, a mantawm deute Pasian biehna diing in kizang zel hi. Cain in zong tuadan ana Pasian ana bieh zieh in Pasian in a biehna sanpieh lou in, Abel in a "A ganhon lah a pieng masapente leh thaupente" tawh Pasian abieh zieh in Pasian kipah mama hi.
THUZAWNA: Pasian phatna leh biehna khu leitung mai a bei diing hilou in gingtute a diing in tangtawn a diing ahi hi. Vangam itun chieng a ibawl diingdan limlahna a tunia Pasian phatna leh biehna ibawl uh ahi hi. Van misiengthoute leh seraphim-te in zong a patawi chimlou uh ahi hi. Khelna/Mawna zieh a gawtmun a pei diing kimlai, ittna zieh a eima tang a hing shi I Mangpa Jesu Krist, Pasian belamnou patawi chimlou diing ihi uhi. Kalsuon sim in, husan sim in Pasian patawi diingte ihi uhi. Jesu Krist in Satan kung nangawn ah "Mangpa na Pasian na be diing a, Ama nna bou nasep diing ahi" (Matt. 4:10) achi leh eite Ama hing tatkhiette a diing in tami thupieh a thupi zaw nalai diei? Tuni'n Pasian min aphat thei den diing leh Ama a bethei den diing in Pasian in thupha hing peden tahen, Amen!
